Šloahta leavggat

Adnojit 3 iešguđetlágan leavgga:

• Gonagasleavga
• Ruvdnaprinssa leavga
• Stáhtaleavga

Sihke Gonagasleavggas ja Ruvdnaprinssa leavggas lea golle Riikaledjon mii doallá silba ákšu rukses duogáža alde. Leavggat leat seamma sturrodagas, muhto Ruvdnaprinssa leavggas lea lákči.

Našunálleavga lea Norgga leavga. Stáhtaleavga lea seammalágan go Našunálleavga, muhto das leat luddestagat.

Gonagasleavga

Šloahtas libarda čađat Gonagasleavga go Gonagas lea Norggas dahje juostá Norgga eanaviidodagain.

Muhto leat guokte dilálašvuođa goas eai gease Gonagasleavgga: Dalle go Gonagas lea Stiftsgårdenis Troandimis dahje Norge Gonagasskiippas (norgga mearraguovllus), de eai gease Gonagasleavgga eaige makkárge eará leavgga Šloahta dáhki ala. De ceaggá guoros leavgastoalpu dáhki alde. Sivvan dasa lea ahte diekkár oktavuođain libarda Gonagasleavga juogo Stiftsgårdenis dahje Gonagasskiippas, ja Gonagasleavga ii galgga goassege libardit guovtti sajes oktanaga. Lea almmatge spiehkastat dán njuolggadusas (geahča Gonagasskiippa).

Ruvdnaprinssa leavga

Go Gonagas lea olgoriikkas, de lea Gonagaslaš Allavuohta Ruvdnaprinsa Regeanta. De libarda Šloahta dáhkis Ruvdnaprinssa leavga. Leavga lonuhuvvo de go Gonagas guođđá riikka.

Stáhtaleavga

Jus sihke Gonagas ja Ruvdnaprinsa leaba olgoriikkas, de galgá Šloahtas libardit Stáhtaleavga. Leavga gessojuvvo de go Regeanta guođđá riikka.

Leavgga geassin bajás ja vulos

Gonagasleavga ja Ruvdnaprinssa leavga eai čuovu dábálaš leavganjuolggadusaid. Dat galget leat leavgastoalppus birra jándora. Ovdalis namuhuvvon čilgehus mearrida dan goas sudno leavggat leat leavgastoalpogeahčen, ja goas galget gessojuvvon eret.

Sturrodagat

Sihke Gonagasleavga ja Ruvdnaprinssa leavga leat golmma storrodagas:

• Gaskamuddosaš sturrodat leavga mii dábálaččat lea anus
• Earenoamáš stuora leavga maid atnet almmolaš leavgabeivviid ja earenoamáš dilálašvuođain nugo stáhtaguossástallamiid oktavuođas ja sullasaš diliin.
• Unna stoarbmaleavggaš mii adno garra bieggan

Levgen Šloahttabalkoŋggas

Muhtomin levgejit Šloahttabalkoŋggas lassin – dahje dan sadjái – go dáhkis. Dat dáhpáhuvvá ovdamearkkadihte go lea almmolaš leavgabeaivi ja Gonagas lea Stiftsgårdenis dahje Gonagasskiippas (norgga mearraguovllus). De lea guoros leavgastoalpu dáhki alde, ja lea Stáhtaleavga mii libarda Šloahttabalkoŋggas.

Levgen balkoŋggas dáhpáhuvvá Majestehta Gonagas gohččuma mielde.

Levgen eará resideanssain

Leavga sáhttá maid libardit eará resideanssain:

• Norge Gonagasskiippas
  Gonagasskiippas lea gonagasleavga badjin go Gonagas lea skiippas. Jus Ruvdnaprinsa lea skiippas, de lea skiippas Ruvdnaprinsaleavga badjin – earret de  jus Gonagas ieš maid lea skiippas ovttas Ruvdnaprinssain.
  
  Skiippas lea maid gonagasleavga badjin go Dronnet lea skiippas ja ii Gonagas ieš – ja maiddái de jus Gonagas lea eará norgga territorias. Die lea áidna spiehkastat dan njuolggadusas ahte gonagasleavga ii sáhte geavahuvvot guovtti báikkis oktanaga.
   
• Stiftsgården
  Stiftsgården levge Gonagasleavggain dan áiggi go Gonagas lea doppe. Go Ruvdnaprinsabárra lea Stiftsgårdenis, de galgá levget Ruvdnaprinssa leavggain – jus Gonagas maid ii leat doppe seammás. Jus eará Gonagasviesu bearašlahtut maid leat orrumin doppe, de galgá levget Stáhtaleavggain. Dat dahkko maid almmolaš leavgabeivviid.
   
• Bygdø Gonagasgárdin
  Gonagasgárdimis libarda Stáhtaleavga go Gonagas lea doppe. Jus eara lahtut Gonagasviesu bearrašis orrot doppe, ja Gonagas ii leat doppe, de galgá levget Stáhtaleavggain – nu maiddái allmmolaš leavgabeivviid.
   
• Skaugum, Oscarshall ja Gamlehaugen
  Diein gárdimiin levgejit Stáhtaleavggain go Gonagasviesu lahtut leat doppe ja almmolaš leavgabeivviid.
   
• Kongsseteren
  Kongsseterenis čuvvot dábálaš leavganjuolggadusaid ja levgejit Našunálleavggain sotnabeivviid ja almmolaš leavgabeivviid. Geavahuvvo norgga vimpelleavga go Gonagas dahje eará Gonagasbearraša lahtut leat orrumin doppe.
   
• Mågerø ja Prinsehytta
  Go doppe leat muhtumat Gonagasviesu bearrašis, de levgejuvvo Našunálleavggain dahje norgga vimpeliin. Sotnabeivviid ja eará almmolaš leavgabeivviid gesset Našunálleavgga. Jus diein báikkiin ii leat oktage, de ii geavahuvvo leavga.